Short News

आता लोकसेवा आयोगाच्या परीक्षेत भगवदगीतेमधील प्रश्न विचारले जाणार आहेत. राजस्थान लोकसेवा आयोगाने 2018 च्या प्रशासकीय परीक्षेच्या अभ्यासक्रमात थोडा बदल केला आहे. त्यामुळे सामान्य ज्ञानाला नितीशास्त्राची जोड देण्यात आली आहे. यामध्ये भगवद्गीता आणि महात्मा गांधी यांच्या जीवनाशी संबंधित प्रश्नांचा समावेश आहे. यात राष्ट्रीय नेते, समाजसुधारक यांच्या जीवनाबद्दलच्या माहितीचा समावेश आहे. 

भारतात पुन्हा नरेंद्र मोदी यांचं सरकार सत्तेत आले नाही, तर भारतासाठी तो फटका असेल, असे मत आंतरराष्ट्रीय स्तरावरील प्रसिद्ध इन्व्हेस्टमेंट बँकिंग कंपनी CLSA चे मुख्य रणनितीकार क्रिस्टोफर वुड्स यांनी व्यक्त केले. 'ग्रीड अँड फिअर' या साप्ताहिकातील लेखात त्यांनी हे मत नोंदवले आहे. 2018 या वर्षात भारताने काही खास कामगिरी केली नाही, मात्र तरी आशियात भारतच वरचढ असल्याचे ते म्हणाले. 

वारंवार अण्वस्त्र हल्ल्यांची धमकी देणारे उत्तर कोरियाचे हुकुमशहा किम जोंग उन यांनी यापुढे अण्वस्त्र आणि बॅलेस्टिक क्षेपणास्त्रांचे परीक्षण करणार नाही असे म्हटले आहे. आजपासूनच हे परीक्षण थांबवण्यात येईल असे जाहीर करण्यात आले आहे. यावर अमेरिकेचे राष्ट्राध्यक्ष ट्रम्प प्रतिक्रिया देताना म्हणाले की, ही जगासाठी आनंदाची बातमी आहे. क्षेपणास्त्रांचे केंद्र बंद करण्यात येणार आहे.

आंतरराष्ट्रीय बाजारपेठेत कच्च्या तेलाचे दर वाढल्याने भारतातील पेट्रोल, डिझेलचे दरही भडकले आहेत. हे सर्व कच्च्या तेलाचा पुरवठा कमी झाल्याने होत आहे. मुंबईत पेट्रोलमध्ये 13 पैसे वाढले आहेत तर डिझेलमध्ये 16 पैशांची वाढ झाली आहे. आज मुंबईत पेट्रोल 82.06 रु.प्रतिलिटर तर डिझेल 69.70रु प्रतिलिटर आहे. राजधानी दिल्लीच्या बाजारातही पेट्रोल 13 पैशांनी तर डिझेल 15 पैशांनी वाढले आहे.