India Short News

दिल्लीतील ३ कारखान्यांना आग; १० जणांचा मृत्यू

दिल्लीतील ३ कारखान्यांना आग; १० जणांचा मृत्यू

दिल्लीतील बवाना औद्योगिक वसाहतीतील तीन कारखान्यांना भीषण आग लागली असून या आगीत १० जणांचा होरपळून मृत्यू झाल्याची प्राथमिक माहिती हाती आली आहे. अग्निशमन दलाचे जवान व २० बंब घटनास्थळी दाखल झाले असून आग आटोक्यात आणण्याचे प्रयत्न युद्धपातळीवर सुरू आहेत. फटाके, प्लास्टिक आणि कार्पेटच्या तीन कारखान्यांमध्ये ही आग भडकली असून कारखान्यांत अनेक कामगार अडकले असल्याने मृतांचा आकडा वाढण्याची भीती आहे.
पालकसभा सुरु असताना विद्यार्थ्याने मुख्याध्यापकांची गोळया झाडून केली हत्या

पालकसभा सुरु असताना विद्यार्थ्याने मुख्याध्यापकांची गोळया झाडून केली हत्या

बारावीत शिकणा-या एका मुलाने शाळेच्या मुख्याध्यापकांची गोळया झाडून हत्या केली. हरीयाणातील यमुनानगरमध्ये ही धक्कादायक घटना घडली. रितू छाबरा असं मृत मुख्याध्यापकांच नाव आहे. बारावीत शिकणा-या विद्यार्थ्यावर शिस्तभंगाची कारवाई करत त्याला शाळेतून काढून टाकण्याचा निर्णय त्यांनी घेतला. मुख्याध्यापकांच्या या निर्णयाने संतप्त झालेल्या विद्यार्थ्याने बंदूक काढली व रितू यांची गोळया झाडून हत्या केली.
न्या. लोया मृत्यूप्रकरणी सोमवारी 'सर्वोच्च' सुनावणी; सरन्यायाधीश बाजू ऐकणार

न्या. लोया मृत्यूप्रकरणी सोमवारी 'सर्वोच्च' सुनावणी; सरन्यायाधीश बाजू ऐकणार

सोहराबुद्दीन शेख चकमक प्रकरणाची सुनावणी करणारे विशेष सीबीआय न्यायालयाचे न्यायमूर्ती ब्रिजगोपाल लोया यांच्या मृत्यूप्रकरणाची सुनावणी आता सरन्यायाधीश दीपक मिश्रा यांच्या अध्यक्षतेखाली होणार आहे. येत्या सोमवारी - 22 तारखेला अन्य दोन न्यायमूर्तींसोबत ते दोन्ही बाजूंचं म्हणणं ऐकणार आहेत. सर्वोच्च न्यायालयाच्या चार न्यायमूर्तींनी सरन्यायाधीश दीपक मिश्रा यांच्या कार्यपद्धतीवर नाराजी व्यक्त केली होती.
गोव्यात टुरिस्ट टॅक्सी चालकांचा संप चिघळला

गोव्यात टुरिस्ट टॅक्सी चालकांचा संप चिघळला

गोव्यात टुरिस्ट टॅक्सीमालकांच्या मागण्यांवर तोडगा येऊ न शकल्याने आजही टॅक्सी बंद ठेवण्यात आल्या आहेत. कालपासून (शुक्रवार) पुकारलेल्या संपामुळे पर्यटकांची मोठी परवड झाली आहे. सुमारे २0 हजार टुरिस्ट टॅक्सी बंद आहेत.डिजिटल मीटरला विरोध करीत गोव्यातील टॅक्सी मालकांनी बंद पुकारला आहे. सरकारी खात्यांसाठी कंत्राटावर चालणाऱ्या अवघ्या काही निवडक टॅक्सी वगळता सुमारे ९५ टक्के टॅक्सी काल बंद होत्या.