Business Short News

രാജ്യത്തെ രണ്ടാമത്തെ ഐടി കമ്പനിയായ ഇൻഫോസിസിൻറെ ചീഫ് എക്സിക്യൂട്ടീവ് ഓഫീസർ സലിൽ പരേഖ് കഴിഞ്ഞ സാമ്പത്തിക വർഷം ശമ്പളമായി വാങ്ങിയത് 24.67 കോടി രൂപ. 2018 ജനുവരിയിലാണ് പരേഖ് ഇൻഫോസിസിൽ സിഇഒ ആയി നിയമിതനാകുന്നത്. അതിന് മുമ്പുള്ള സാമ്പത്തിക വർഷത്തെ ഇദ്ദേഹത്തിന്റെ ശമ്പളം സംബന്ധിച്ച വിവരങ്ങൾ ലഭ്യമല്ല. കമ്പനിയുടെ വാർഷിക റിപ്പോർട്ടനുസരിച്ച് 6.07 കോടി രൂപയാണ് സലിൽ പരേഖിന്റെ നിശ്ചിത ശമ്പളം.

ഗുജറാത്ത് കോ- ഓപ്പറേറ്റീവ് മിൽക്ക് മാർക്കറ്റിം​ഗ് ഫെഡറേഷന് കീഴിലുള്ള അമൂൽ പാലിന് ഇന്ന് മുതൽ വില കൂടും. ആറു ബ്രാൻഡുകളിലുള്ള പാലിനും ലിറ്ററിന് രണ്ടു രൂപ വീതമാണ് വില വർദ്ധിപ്പിക്കുന്നത്. ഇന്നലെയാണ് വില വർദ്ധനവ് സംബന്ധിച്ച വിവരം പ്രഖ്യാപിച്ചത്. ഡൽഹി എൻസിആർ, ഗുജറാത്ത്, പശ്ചിമബംഗാൾ, കൊൽക്കത്ത, ഉത്തരാഞ്ചൽ, മഹാരാഷ്ട്ര തുടങ്ങിയ സംസ്ഥാനങ്ങളിലാണ് ആദ്യ ഘട്ടത്തിൽ വില വർദ്ധിപ്പിക്കുന്നത്.

ഐടി, സോഫ്ട്‍വെയർ മേഖലകളിലുള്ളവർക്ക് ഈ വർഷം നല്ല കാലം. 2019ൽ ഈ മേഖലകളിൽ പരമാവധി തൊഴിലവസരങ്ങൾ സൃഷ്ടിക്കപ്പെടുമെന്നാണ് റിപ്പോർട്ടുകൾ. ഓൺലൈൻ ജോബ് പോർട്ടലായ ഷൈൻ.കോം പുറത്തിറക്കിയ റിപ്പോർട്ടിലാണ് ഇക്കാര്യങ്ങൾ വ്യക്തമാക്കിയിരിക്കുന്നത്. കഴിഞ്ഞ വർഷത്തെ അപേക്ഷിച്ച് 2019 ഏപ്രിലിലാണ് ഈ മേഖലയിൽ ഏറ്റവും കൂടുതൽ നിയമനങ്ങൾ നടന്നിട്ടുള്ളത്.

ലോക്സഭാ തിരഞ്ഞെടുപ്പിന്റെ എക്സിറ്റ് പോൾ പ്രവചനം ഇന്ന് ഓഹരി വിപണിയെ ഏറെ സ്വാധീച്ചു. അതുകൊണ്ട് തന്നെ മേയ് 23ന് യഥാർത്ഥ ഫലം പുറത്തു വരുമ്പോഴും വിപണിയിൽ കുതിപ്പ് തുടരുമെന്നാണ് അനലിസ്റ്റുകളുടെ അഭിപ്രായം. മോദി സർക്കാർ അധികാരത്തിലെത്തിയാൽ ഏറ്റവും കൂടുതൽ നേട്ടമുണ്ടാക്കുന്ന ഓഹരികൾ ഏതൊക്കെയെന്നും നിക്ഷേപകർ പോർട്ട്ഫോളിയോയിൽ ഉൾപ്പെടുത്തേണ്ട ഓഹരികൾ ഏതെല്ലാമെന്നും പരിശോധിക്കാം.