ഇന്ത്യയിൽ പുതുമോഡലുകളുമായി കളംനിറഞ്ഞാടുകയാണ് ചെക്ക് റിപ്പബ്ലിക്കൻ വാഹന നിർമാതാക്കളായ സ്കോഡ. കൈലാക് എത്തിയതോടെ വിൽപ്പന ഉയരങ്ങളിലേക്ക് കുതിക്കുമ്പോൾ പുത്തൻ കൊഡിയാക്കും, ഒക്ടാവിയ RS പെർറോമൻസ് സെഡാനും കുഷാഖ് ഫെയ്‌സ്‌ലിഫ്റ്റുമെല്ലാം പുറത്തിറക്കിയാണ് കമ്പനി എതിരാളികളെ ഞെട്ടിച്ചത്. ഇനി അധികം വൈകാതെ മിഡ്-സൈസ് സെഡാനായ സ്ലാവിയയുടെ ഫെയ്‌സ്‌ലിഫ്റ്റ് (Skoda Slavia Facelift) പതിപ്പും പുറത്തിറക്കി സ്കോഡ കൂടുതൽ ശക്തിയാർജിക്കാൻ തയാറെടുക്കുകയാണ്. സി-സെഗ്മെൻ്റ് നിരയിലെ ടോപ്പ് സെല്ലിംഗ് മോഡലുകളിൽ ഒന്നായ സ്ലാവിയയ്ക്ക് മുഖംമിനുക്കൽ ലഭിക്കുന്നതോടെ വാങ്ങാനായി വരി നിൽക്കുന്നവരുടെ എണ്ണവും കൂടിയേക്കാം.

ചെക്ക് റിപ്പബ്ലിക്കൻ വാഹന നിർമാതാക്കളായ സ്കോഡയുടെ ഇന്ത്യയിലെ ഉയർത്തെഴുന്നേൽപ്പിന് കാരണക്കാരനായ മോഡലുകളിൽ ഒന്നാണ് കുഷാഖ്. ഹ്യുണ്ടായി ക്രെറ്റയും കിയ സെൽറ്റോസും അരങ്ങുവാണിരുന്ന മിഡ്-സൈസ് എസ്‌യുവി വിഭാഗത്തിലെത്തിയ കുഷാഖ് തൻ്റേതായ രീതിയിൽ വേറിട്ടുനിൽക്കാൻ എപ്പോഴും ശ്രമിച്ചിരുന്നു. സേഫ്റ്റിയുടെ കാര്യത്തിൽ പോലും ഉയർന്ന മാർക്ക് നേടി വിജയിച്ച എസ്‌യുവി പക്ഷേ വിൽപ്പനയിൽ വലിയ സംഖ്യകളൊന്നും സ്വന്തമാക്കിയിട്ടില്ല. എങ്കിലും തരക്കേടില്ലാത്ത രീതിയിൽ വിറ്റഴിച്ചിരുന്ന കുഷാഖിൻ്റെ 2026 ജനുവരി മാസത്തെ വിൽപ്പന കണക്കുകൾ കമ്പനിയെ വരെ ഞെട്ടിച്ചിരിക്കുകയാണ്.

ടർബോ പെട്രോൾ എഞ്ചിനുകളോടുള്ള (Turbo Petrol Engine) ഇന്ത്യക്കാരുടെ പ്രണയം കൂടിവരികയാണ്. നല്ല പെർഫോമൻസ് തരുന്നുവെന്നതാണ് ഇതിന് പിന്നിലുള്ള കാരണം. എന്നാൽ ഹൈ പെർഫോമൻസ് ടർബോചാർജ്ഡ് എഞ്ചിനുകളെ അപേക്ഷിച്ച് നാച്ചുറലി ആസ്പിറേറ്റഡ് (NA) പെട്രോൾ എഞ്ചിനുകളുള്ള കാറുകൾക്ക് വല്ലാത്തൊരു ഫാൻബേസ് തന്നെയുണ്ട്. അതിൻ്റെ പ്രധാന കാരണം വിശ്വാസ്യത, ലീനിയർ പവർ ഡെലിവറി, മൈലേജ്, കുറഞ്ഞ മെയിൻ്റനെൻസ് എന്നിവയെല്ലാം ഒന്നിച്ച് കിട്ടുമെന്നതാണ്. 2026-ൽ ലഭ്യമായ ഏറ്റവും മികച്ച നാച്ചുറലി ആസ്പിറേറ്റഡ് പെട്രോൾ എഞ്ചിനുകളും (Naturally Aspirated Petrol Engines)വാഹനങ്ങളും ഏതൊക്കെയാണെന്ന് പരിചയപ്പെടുത്തി തരാം.

വിൽപ്പനയുടെ കാര്യത്തിൽ എതിരാളികളില്ലെങ്കിലും തങ്ങളുടെ അടുത്തേക്ക് വരുന്ന ഉപഭോക്താക്കളെ തൃപ്‌തരാക്കി വിടാൻ പ്രത്യേകം ശ്രമിക്കാറുള്ളവരാണ് രാജ്യത്തെ ഏറ്റവും വലിയ വാഹന നിർമാതാക്കളായ മാരുതി സുസുക്കി. 2026 ഫെബ്രുവരിയിലും ഇക്കാര്യത്തിൽ വിട്ടുവീഴ്ച്ചയൊന്നും വരുത്തിയിട്ടില്ല ബ്രാൻഡ്. മാരുതി സുസുക്കിയുടെ അരീന ഡീലർഷിപ്പുകളിലൂടെ ഈ മാസവും വമ്പൻ ഓഫറുകളും ആനുകൂല്യങ്ങളുമാണ് ഒരുക്കിവെച്ചിരിക്കുന്നത്. കൺസ്യൂമർ ഓഫർ, സ്ക്രാപ്പേജ് അല്ലെങ്കിൽ എക്സ്ചേഞ്ച് ഓഫർ, കോർപ്പറേറ്റ് ഓഫറുകൾ എന്നിവയുടെ രൂപത്തിലാണ് ഡിസ്കൌണ്ടുകൾ പ്രഖ്യാപിച്ചിരിക്കുന്നത്. ഈ മാസം ഒരു കാർ വാങ്ങാൻ ആഗ്രഹിക്കുന്നുവെങ്കിൽ ഏറ്റവും നല്ല സയമം ഇതുതന്നെയാണ്.

പോലീസ് വാഹനങ്ങള്‍ എന്ന് ഓര്‍ക്കുമ്പോള്‍ നമ്മുടെ മനസിലേക്ക് ഓടി വരുന്ന ചില മോഡലുകള്‍ ഉണ്ടാകും. ബൈക്കുകളുടെ കാര്യമെടുത്താല്‍ റോയല്‍ എന്‍ഫീല്‍ഡ് പോലീസ് സേനയുടെ ഔദ്യോഗിക പട്രോളിംഗ് ബൈക്ക് ആയിരുന്ന സ്ഥിതിയില്‍ നിന്ന് മാറ്റം സംഭവിച്ചു. കൂടുതല്‍ വേഗതയും വിശ്വാസ്യതയുമുള്ള മോഡേണ്‍ മോട്ടോര്‍സൈക്കിളുകള്‍ സേനയുടെ ഭാഗമായി. ഹോണ്ട, ബജാജ്, സുസുക്കി, ടിവിഎസ്, ഹീറോ എന്നീ ബ്രാന്‍ഡുകളില്‍ നിന്നുള്ള ജനപ്രിയ മോഡലുകള്‍ക്ക് പുറമെ ഹാര്‍ലി ഡേവിഡ്‌സണ്‍ വരെ ഉപയോഗിക്കുന്ന പോലീസ് സേന ഇന്ന് രാജ്യത്തുണ്ട്. കാലഘട്ടത്തിന്റെ ആവശ്യം മുന്‍നിര്‍ത്തി കേരള പോലീസ് സമീപകാലത്തായി സീറോ എമിഷന്‍ വാഹനങ്ങള്‍ കൂടുതലായി തങ്ങളുടെ വാഹനവ്യൂഹത്തില്‍ ഉള്‍പ്പെടുത്താന്‍ തുടങ്ങിയിട്ടുണ്ട്.

ഇന്ത്യയിൽ ഏറ്റവും കൂടുതൽ വിറ്റഴിക്കപ്പെടുന്ന എംപിവി ഏതാണെന്ന് ചോദിച്ചാൽ ആരും കണ്ണുംപൂട്ടി പറയുന്ന പേരാണ് മാരുതി സുസുക്കി എർട്ടിഗയുടേത്. ടൊയോട്ട ഇന്നോവ, കിയ കാരെൻസ് ക്ലാവിസ്, മഹീന്ദ്ര മറാസോ തുടങ്ങിയ വമ്പൻമാരോടെല്ലാം ഏറ്റുമുട്ടി ഈ പദവി എർട്ടിഗ അലങ്കരിക്കാൻ തുടങ്ങിയിട്ട് കാലംകുറച്ചായി. ദേ ഇപ്പോൾ 2026 ജനുവരിയിൽ ഇന്ത്യയിൽ ഏറ്റവും കൂടുതൽ വിറ്റഴിക്കപ്പെടുന്ന എംപിവി എന്ന സ്ഥാനം മാരുതി സുസുക്കി എർട്ടിഗ നിലനിർത്തിയിരിക്കുകയാണ്. വലിയ കുടുംബമുള്ളവർക്ക് എപ്പോഴും ഒരു സെവൻ സീറ്റർ മോഡൽ വാങ്ങണമെന്ന ആഗ്രഹം ഉള്ളിലുണ്ടാവുമല്ലോ അവരുടെയെല്ലാം സ്വപ്‌നങ്ങൾ പൂവണിയിക്കുന്നതും ഇതേ മോഡൽ തന്നെയാണ്.

ഇന്ത്യൻ വാഹന വിപണിയിൽ ഏറ്റവും വലിയ വാഹന നിർമാതാക്കൾ എന്ന പദവി ഏറെനാളായി അലങ്കരിക്കുന്നത് മാരുതി സുസുക്കിയാണ്. എതിരാളികളേക്കാൾ ഏറെ മുന്നിലോടുന്ന കമ്പനി ഓരോ മാസവും ലീഡ് വർധിപ്പിച്ച് മുന്നേറുന്ന കാഴ്ച്ചയും കാണാനാവും. എന്നാൽ ഇവിടെ രണ്ടാം സ്ഥാനത്തിനായി ഹ്യുണ്ടായിയും മഹീന്ദ്രയും ടാറ്റയും തമ്മിൽ വലിയ മത്സരമാണ് നടക്കുന്നത്. എതിരാളികളുടെ മുന്നിൽ കയറാനായി എല്ലാ മാസവും ഗംഭീര ഡിസ്കൌണ്ട് ഓഫറുകൾ പ്രഖ്യാപിച്ച് ദക്ഷിണ കൊറിയൻ വാഹന നിർമാതാക്കൾ വേറിട്ടുനിൽക്കാൻ ശ്രമിക്കാറുണ്ട്. ഇപ്പോഴിതാ ഫെബ്രുവരി മാസത്തിലും മോഡൽ നിരയിൽ വലിയ കിഴിവുകളപമായി എത്തിയിരിക്കുകയാണ് ഹ്യുണ്ടായി.

ഇന്ത്യന്‍ വാഹന വിപണിയില്‍ ഉപഭോക്താക്കള്‍ ഒരു കാര്‍ തിരഞ്ഞെടുക്കുമ്പോള്‍ ഇന്നും ഏറ്റവും കൂടുതല്‍ മുന്‍ഗണന നല്‍കുന്നത് മൈലേജിനാണ്. പെട്രോള്‍ വിലയിലുണ്ടാകുന്ന മാറ്റങ്ങള്‍ സാധാരണക്കാരന്റെ മാസ ബജറ്റിനെ ബാധിക്കാതിരിക്കാന്‍ വാഹന നിര്‍മ്മാതാക്കള്‍ ഉയര്‍ന്ന ഇന്ധനക്ഷമത വാഗ്ദാനം ചെയ്യുന്ന സിഎന്‍ജി കാറുകളിലേക്കും ഹൈബ്രിഡ് സാങ്കേതികവിദ്യയിലേക്കും ചുവടുമാറുകയാണ്. നിലവില്‍ ഇന്ത്യയില്‍ ലഭ്യമായതില്‍ ഏറ്റവും മികച്ച ഇന്ധനക്ഷമത വാഗ്ദാനം ചെയ്യുന്ന 5 മോഡലുകളുടെ പട്ടിക താഴെ നല്‍കുന്നു. കിലോഗ്രാമിന് 30 കിലോമീറ്ററിന് മുകളില്‍ മൈലേജ് നല്‍കുന്ന സിഎന്‍ജി മോഡലുകളെ തല്‍ക്കാലം പട്ടികയില്‍ ഉള്‍പ്പെടുത്തിയിട്ടില്ലെന്ന് ഓര്‍മിപ്പിക്കട്ടെ.

ഇന്ത്യക്കാർക്ക് ഇലക്‌ട്രിക് കാറുകളോടുള്ള (Electric Cars) പ്രണയം ഏറിവരികയാണ്. ടാറ്റയും എംജിയും മഹീന്ദ്രയുമെല്ലാം വൈദ്യുത കാറുകളിലൂടെ പണംവാരുമ്പോൾ മറ്റ് ബ്രാൻഡുകളും അസൂയയോടെയാണ് നോക്കിനിൽക്കുന്നത്. എന്നാൽ വലിയ വില കൊടുത്ത് ഇവികൾ വാങ്ങാൻ പലർക്കും ഇപ്പോഴും മടിയാണ്. കമ്പനി പറയുന്ന റേഞ്ച് കിട്ടുമോ, ബാറ്ററി വേഗം പണിതരുമോ, ചാർജിംഗ് എങ്ങനെ കാര്യക്ഷമമാക്കും എന്നിങ്ങനെ ധാരാളം ആശങ്കകൾ ഇവി വാങ്ങുന്നവർക്കുണ്ട്. അതുമല്ല 10 ലക്ഷം രൂപയിൽ താഴെ വിലയിൽ അങ്ങനെ അധികം മോഡലുകളും ഇന്ത്യയിൽ ഇപ്പോൾ ലഭ്യമല്ലെന്നത് ഏവരേയും നിരാശപ്പെടുത്തുന്ന കാര്യമാണ്.

കാല്‍നൂറ്റാണ്ടിലേറെ കാലമായി ഇന്ത്യന്‍ വാഹന വിപണിയില്‍ നിറസാന്നിധ്യമായ മഹീന്ദ്ര ബൊലേറോ (Mahindra Bolero) 2026 കലണ്ടര്‍ വര്‍ഷത്തിന്റെ തുടക്കത്തില്‍ മികച്ച വില്‍പ്പന നേട്ടം കൈവരിച്ചു. ജനുവരി മാസത്തെ കണക്കുകള്‍ പ്രകാരം 36 ശതമാനം വാര്‍ഷിക വളര്‍ച്ചയാണ് ഈ മോഡല്‍ രേഖപ്പെടുത്തിയത്. കരുത്തുറ്റ ബോഡി, കുറഞ്ഞ പരിപാലന ചിലവ്, കൂടുതല്‍ യാത്രക്കാരെ ഉള്‍ക്കൊള്ളാനുള്ള ശേഷി എന്നിവയാണ് ബൊലേറോയെ വിപണിയിലെത്തി വര്‍ഷങ്ങളായിട്ടും ഇന്ത്യക്കാരുടെ പ്രിയപ്പെട്ട മോഡലാക്കി നിലനിര്‍ത്തുന്നത്. 2026 ജനുവരിയില്‍ ആകെ 11,841 യൂണിറ്റ് ബൊലേറോ കാറുകളാണ് മഹീന്ദ്ര വിറ്റഴിച്ചത്.

സെൽറ്റോസ്, സോനെറ്റ്, കാരെൻസ് എന്നീ മോഡലുകളിലൂടെ ഇന്ത്യക്കാരുടെ മനസിൽ കുടിയേറിപ്പാർത്തവരാണ് ദക്ഷിണ കൊറിയൻ വാഹന നിർമാതാക്കളായ കിയ. ഇന്നും ഈ മോഡലുകളുടെ വിൽപ്പനയിലൂടെ മുമ്പോട്ട് കുതിക്കുന്ന ബ്രാൻഡിന് പക്ഷേ ഒരു സങ്കടമുണ്ട്. മറ്റൊന്നുമല്ല, മിടുക്കനായ തങ്ങളുടെ സിറോസ് എന്ന കോംപാക്‌ട് എസ്‌യുവി വാങ്ങാൻ അധികമാരും ഷോറൂമിലെത്തുന്നില്ല എന്നതാണ് കിയയുടെ ഇപ്പോഴത്തെ വിഷമം. ഒരു പരീക്ഷണമെന്ന പോലെയാണ് കോംപാക്‌ട് എസ്‌യുവി വിഭാഗത്തിലേക്ക് ടോൾബോയ് സ്പോർട് യൂട്ടിലിറ്റി വാഹനമായി സിറോസ് അവതരിപ്പിക്കുന്നത്. നിലവിൽ സെഗ്മെൻ്റിലുണ്ടായിരുന്ന സങ്കൽപ്പങ്ങളെല്ലാം പൊളിച്ചെഴുതാൻ ശേഷിയുള്ളവനായിരുന്നുവെങ്കിലും വാഹനം ഫ്ലോപ്പാവുന്ന കാഴ്ച്ചയാണ് ഇപ്പോൾ കാണാനാവുന്നത്.

രാജ്യത്തെ ഏറ്റവും വലിയ വാഹന നിര്‍മ്മാതാക്കളായ മാരുതി സുസുക്കി തങ്ങളുടെ കന്നി ഇലക്ട്രിക് കാറായ ഇവിറ്റാര (eVitara) ഈ മാസം വിപണിയില്‍ എത്തിക്കാനുള്ള തയാറെടുപ്പിലാണ്. ഔദ്യോഗിക ലോഞ്ചിന് മുമ്പ് ഇലക്ട്രിക് എസ്‌യുവിയുടെ വിലയും വേരിയന്റുകളും ഉള്‍പ്പെടെയുള്ള നിര്‍ണായക വിവരങ്ങള്‍ ഇന്റര്‍നെറ്റില്‍ ചോര്‍ന്നു. തമിഴ്നാട്ടിലെ തിരുപ്പൂരിലുള്ള ഒരു നെക്‌സ ഡീലര്‍ഷിപ്പിന്റെ വെബ്സൈറ്റിലൂടെയാണ് ഈ വിവരങ്ങള്‍ പുറത്തുവന്നത്. ചോര്‍ന്ന വിവരങ്ങള്‍ പ്രകാരം മാരുതി ഇവിറ്റാരയുടെ എക്‌സ്-ഷോറൂം വില 24,78,958 രൂപയായിരിക്കും. നെക്‌സയുടെ ഔദ്യോഗിക വെബ്സൈറ്റിലെ കോണ്‍ഫിഗറേറ്ററിലും ഈ വില നേരത്തെ ദൃശ്യമായിരുന്നുവെങ്കിലും പിന്നീട് അത് നീക്കം ചെയ്തു.

ഇന്ത്യൻ വിപണിയിലെ ഐതിഹാസിക ഇരുചക്ര വാഹന നിർമാതാക്കളാണ് യെസ്‌ഡി. ക്ലാസിക് ലെജന്‍ഡ്‌സ് എന്ന കമ്പനിയിലൂടെ ഒരു കാലത്ത് നിരത്തുകളെ തരംഗംകൊള്ളിച്ച കമ്പനി ഇപ്പോൾ റോയൽ എൻഫീൽഡ് അരങ്ങുവാഴുന്ന മിഡ്-കപ്പാസിറ്റി മോട്ടോർസൈക്കിൾ സെഗ്മെൻ്റിലെ പ്രധാന ബ്രാൻഡുകളിൽ ഒന്നായി വിലസി നടക്കുകകയാണ്. മുഖ്യ ശത്രുവായ റോയൽ എൻഫീൽഡിനോട് ഇതുവരെ ഇടിച്ചുനിൽക്കാനായിട്ടില്ലെങ്കിലും നാലാളറിയുന്ന തരത്തിൽ വളരാൻ കമ്പനികൾക്കായിട്ടുണ്ടെന്നതാണ് ശ്രദ്ധേയമാവുന്ന കാര്യം. പഴയ ഇതിഹാസങ്ങളെ തിരിച്ചെത്തിച്ചതിനൊപ്പം കാലത്തിനിണങ്ങുന്ന മോഡലുകളെയും രംഗത്തിറക്കി കമ്പനി തരക്കേടില്ലാത്ത രീതിയിൽ മുന്നോട്ട് പോവുകയാണ്.

ഇന്ത്യയിലെ 7 സീറ്റര്‍ മള്‍ട്ടി പര്‍പ്പസ് വാഹന വിഭാഗത്തില്‍ (എംപിവി) മുന്നേറ്റം തുടര്‍ന്ന് കിയ കാരെന്‍സ്. 2026 ജനുവരി മാസം കൊറിയന്‍ എംപിവിയുടെ 5,633 യൂണിറ്റുകളാണ് വിറ്റുപോയത്. 2025 ജനുവരി മാസം വിറ്റ 5,522 യൂണിറ്റുകളെ അപേക്ഷിച്ച് 2 ശതമാനം വര്‍ധനവ് രേഖപ്പെടുത്താന്‍ കാരെന്‍സിന് സാധിച്ചു. നിലവില്‍ രാജ്യത്ത് ഏറ്റവുമധികം വില്‍ക്കപ്പെടുന്ന പത്ത് 7-സീറ്റര്‍ വാഹനങ്ങളുടെ പട്ടികയില്‍ ആറാം സ്ഥാനത്താണ് കിയ കാരെന്‍സ്. മാരുതി സുസുക്കി എര്‍ട്ടിഗ, മഹീന്ദ്ര സ്‌കോര്‍പിയോ, ബൊലേറോ തുടങ്ങിയ പ്രമുഖ മോഡലുകള്‍ ആദ്യ സ്ഥാനങ്ങളില്‍ ഇടംപിടിച്ചു.

ഇലക്ട്രിക് വാഹനങ്ങൾ (Electric Vehicles) ജനകീയമായതോടെ ഇന്ധനച്ചെലവിൽ നിന്നും ആളുകൾക്ക് ഒരുവിധം മുക്തിനേടാനായിയിട്ടുണ്ട്. നിലവിൽ ടാറ്റയും എംജിയും മഹീന്ദ്രയും പോലുള്ള വൻകിട ബ്രാൻഡുകളാണ് കളംനിറഞ്ഞുനിൽക്കുന്നതെങ്കിലും നിരവധി സ്റ്റാര്‍ട്ടപ്പ് കമ്പനികള്‍ ഇന്ത്യയിൽ മുളപൊട്ടിവരുന്നുണ്ട്. അത്തരത്തില്‍ ഒരു ബ്രാൻഡാണ് ഹരിയാനയിലെ ഗുരുഗ്രാം ആസ്ഥാനമായി പ്രവര്‍ത്തിക്കുന്ന ബ്ലിങ്ക് മൊബിലിറ്റി (Blinq Mobility). കുറഞ്ഞ വിലയില്‍ ഇലക്ട്രിക് കാര്‍ വാങ്ങാന്‍ ആഗ്രഹിക്കുന്നവര്‍ക്കുള്ള ഡെസ്റ്റിനേഷനാണ് ബ്ലിങ്ക്. ടാറ്റ ടിയാഗോ ഇവിയും എംജി കോമെറ്റ് ഇവിയുമെല്ലാം വാങ്ങുന്നതിൻ്റെ പകുതി പൈസയ്ക്ക് ബ്ലിക്ക് ഇവി വാങ്ങിക്കാനാവുമെന്നാണ് വിശ്വാസം.

ഇന്ത്യന്‍ വാഹന വിപണിയില്‍ ദശാബ്ദങ്ങളായി ഒന്നാം സ്ഥാനം അലങ്കരിക്കുന്ന കമ്പനിയാണ് മാരുതി സുസുക്കി (Maruti Suzuki). നിലവില്‍ അരീന, നെക്‌സ ഡീലര്‍ഷിപ്പുകള്‍ വഴി ഒന്നര ഡസനിനടുത്ത് കാറുകളാണ കമ്പനി വിപണനം ചെയ്യുന്നത്. എന്നാല്‍ 2026 ജനുവരിയിലെ കണക്കുകള്‍ പ്രകാരം, മികച്ച മൈലേജും സിഎന്‍ജി സൗകര്യവുമുണ്ടായിട്ടും മാരുതിയുടെ ചില മോഡലുകളുടെ വില്‍പ്പന 2000 യൂണിറ്റില്‍ താഴെയായി ചുരുങ്ങിയിരിക്കുകയാണ്. കഴിഞ്ഞ മാസം ഏറ്റവും കുറവ് വില്‍പ്പന നേടിയ 5 മാരുതി സുസുക്കി കാറുകള്‍ ഏതൊക്കെയാണെന്ന് നമുക്ക് ഈ ലേഖനത്തില്‍ പരിശോധിക്കാം.

ഇന്ത്യക്കായി തങ്ങളുടെ ആദ്യത്തെ ഇലക്‌ട്രിക് എസ്‌യുവി അവതരിപ്പിച്ച് ദിവസങ്ങൾക്കുള്ളിൽ ആഗോള വിപണിക്കും പുത്തൻ ഇവി സമ്മാനിച്ച് ഞെട്ടിച്ചിരിക്കുകയാണ് ജാപ്പനീസ് വാഹന നിർമാതാക്കളായ ടൊയോട്ട. ഹൈലാൻഡർ (Toyota Highlander) എന്ന ഐക്കണിക് സ്പോർട് യൂട്ടിലിറ്റി വാഹനത്തെയാണ് ബ്രാൻഡ് ഇലക്ട്രിക് വേഷമണിയിച്ച് വിപണനത്തിന് എത്തിച്ചിരിക്കുന്നത്. യുഎസിനായുള്ള ടൊയോട്ടയുടെ ആദ്യത്തെ മൂന്ന്-വരി ബാറ്ററി ഇലക്ട്രിക് വാഹനമാണിത് എന്നതും വലിയൊരു പ്രത്യേകതയാണ്. കെന്റക്കിയിൽ പ്രാദേശികമായി കൂട്ടിച്ചേർത്താണ് അമേരിക്കയിൽ ഇവി വിപണനത്തിന് എത്തിയിരിക്കുന്നത്. ബാറ്ററി ഘടകങ്ങൾ അടുത്തിടെ സ്ഥാപിതമായ നോർത്ത് കരോലിന പ്ലാൻ്റിലാവും നിർമിക്കുക.

ഗുജറാത്തിലെ റാന്‍ ഉത്സവത്തിന്റെ രണ്ടാം വര്‍ഷത്തില്‍ ടിവിഎസ് മോട്ടോര്‍ കമ്പനി തങ്ങളുടെ പ്രശസ്ത മോഡലായ റോണിന്റെ സ്‌പെഷ്യല്‍ എഡിഷന്‍ അവതരിപ്പിച്ചു. 'റാന്‍ ഉത്സവ് കസ്റ്റം സീരീസിന്റെ' ഭാഗമായാണ് ടിവിഎസ് റോണിന്‍ റാന്‍ ഓഫ് കച്ച് ലമിറ്റഡ് എഡിഷന്‍ (TVS Ronin Rann Of Kutch Edition) മോട്ടോര്‍സൈക്കിള്‍ പുറത്തിറക്കിയിരിക്കുന്നത്. കച്ചിലെ വെള്ളമണല്‍ പരപ്പുകളില്‍ നിന്ന് പ്രചോദനം ഉള്‍ക്കൊണ്ടാണ് ഇതിന്റെ രൂപകല്‍പ്പന. കച്ചിലെ പ്രകൃതിഭംഗിയും സാംസ്‌കാരിക പൈതൃകവും ഒത്തുചേരുന്ന രീതിയില്‍ ഇത് ഡിസൈന്‍ ചെയ്തിരിക്കുന്നു. 'സിംഫണി ഓഫ് സാള്‍ട്ട് ആന്‍ഡ് സ്‌കൈ' എന്ന പ്രമേയത്തിലാണ് ഈ വാഹനം കസ്റ്റമൈസ് ചെയ്തിരിക്കുന്നത്.

ഇലക്‌ട്രിക് വാഹന വിപണിയിൽ ടാറ്റയ്ക്കും മുമ്പേ സാന്നിധ്യമായ കമ്പനിയായിരുന്നു മഹീന്ദ്ര ആൻഡ് മഹീന്ദ്ര (Mahindra And Mahindra). എന്നാൽ കാര്യമായ രീതിയിൽ ക്ലച്ചുപിടിക്കാനാവാതിരുന്ന ബ്രാൻഡ് പലവിധ മോഡലുകൾ പരീക്ഷിച്ചുവെങ്കിലും ക്ലച്ചുപിടിച്ചത് ബോൺ ഇലക്ട്രിക് എസ്‌യുവികളിലൂടെയായിരുന്നു. പിന്നീട് ഇതുവരെ തിരിഞ്ഞുനോക്കേണ്ടി വന്നിട്ടില്ലെങ്കിലും വളരെ കരുതലോടെയാണ് മഹീന്ദ്ര മുമ്പോട്ട് പോവുന്നത്. BE 6, XEV 9e തുടങ്ങിയ വമ്പൻമാർ തുടങ്ങിവെച്ച ആരവം മറ്റൊരു തലത്തിലെത്തിക്കുവാനായി വിപണിയിലേക്ക് എത്തിയത് XEV 9S എന്ന 7-സീറ്റർ ഫാമിലി ഇലക്‌ട്രിക് സ്പോർട് യൂട്ടിലിറ്റി വാഹനമാണ്.

ഇന്ത്യന്‍ റോഡ് അടിസ്ഥാന സൗകര്യ വികസനത്തില്‍ വിപ്ലവകരമായ മാറ്റവുമായി മുംബൈ നഗരം. ഇന്ത്യയിലെ ആദ്യത്തെ 'മ്യൂസിക്കല്‍ റോഡ്' മുംബൈയില്‍ യാഥാര്‍ത്ഥ്യമായി. നരിമാന്‍ പോയിന്റിനും വര്‍ളിക്കുമിടയിലുള്ള പാതയിലാണ് ഡ്രൈവര്‍മാര്‍ക്കും യാത്രക്കാര്‍ക്കും വേറിട്ട അനുഭവം നല്‍കുന്ന ഈ സംവിധാനം ഒരുക്കിയിരിക്കുന്നത്. വാഹനങ്ങള്‍ ഒരു പ്രത്യേക വേഗതയില്‍ റോഡിലൂടെ സഞ്ചരിക്കുമ്പോഴാണ് സംഗീതം ആസ്വദിക്കാന്‍ സാധിക്കുക. റോഡിന്റെ ഉപരിതലത്തില്‍ പ്രത്യേകമായി രൂപകല്‍പ്പന ചെയ്ത റംബിള്‍ സ്ട്രിപ്പുകളാണ് (Rumble Strips) ഇതിനായി ഉപയോഗിച്ചിരിക്കുന്നത്.

ഇന്ത്യയിലെ മിഡ്-സൈസ് എസ്‌യുവി സെഗ്മെൻ്റിലെ പഴയ പ്രതാപം തിരിച്ചെടുക്കാനായി കിയ സെൽറ്റോസിൻ്റെ ന്യൂജെൻ മോഡൽ വിപണിയിൽ അവതരിച്ചത് ഇക്കഴിഞ്ഞയിടയ്ക്ക് ആയിരുന്നു. ആഗോളതലത്തിലുള്ള ടെല്ലുറൈഡിൻ്റെ സ്റ്റൈലും പോക്കറ്റിന് ഇണങ്ങുന്ന വിലയും മോഡേൺ ഫീച്ചറുകളുമെല്ലാം കുത്തിനിറച്ചെത്തിയ പുതുതലമുറ പതിപ്പിനെ വണ്ടിഭ്രാന്തൻമാരെല്ലാം ഇരുകൈയും നീട്ടി സ്വീകരിച്ച് കഴിഞ്ഞിരിക്കുകയാണ്. മാരുതി സുസുക്കി ഗ്രാൻഡ് വിറ്റാരയോടും, വിക്ടോറിസിനോടും ടൊയോട്ട അർബൻ ക്രൂസിയർ ഹൈറൈഡറിനോടും നഷ്‌ടപ്പെട്ടുപോയ സ്ഥാനം ആദ്യ മാസത്തിൽ തന്നെ തിരികെപ്പിടിച്ചിരിക്കുകയാണ് പുത്തൻ സെൽറ്റോസ്. ജനുവരി മാസത്തെ വിൽപ്പന കണക്കുകൾ പുറത്തുവരുമ്പോൾ സെഗ്മെൻ്റിൽ മൂന്നാം സ്ഥാനത്തേക്ക് എത്തിയിരിക്കുകയാണ് ആശാൻ.

ജെഎസ്ഡബ്ല്യു എംജി മോട്ടോര്‍ ഇന്ത്യ തങ്ങളുടെ ഏറ്റവും പുതിയ ഫ്‌ലാഗ്ഷിപ്പ് മോഡലായ 'മജസ്റ്റര്‍' (MG Majestor) കഴിഞ്ഞ ദിവസം ഇന്ത്യന്‍ വിപണിക്ക് പരിചയപ്പെടുത്തി. ഇന്നലെയാണ് (2026 ഫെബ്രുവരി 12) ഈ പ്രീമിയം ഫുള്‍സൈസ് എസ്‌യുവി അവതാരപ്പിറവിയെടുത്തത്. ടൊയോട്ട ഫോര്‍ച്യൂണര്‍ വര്‍ഷങ്ങളായി അടക്കിവാഴുന്ന ഡി+ എസ്‌യുവി സെഗ്മെന്റിലേക്കാണ് മജസ്റ്ററിന്റെ വരവ്. ഇക്കഴിഞ്ഞ കാലങ്ങള്‍ക്കിടയില്‍ നിരവധി എതിരാളികള്‍ വന്ന് പോയിട്ടും ഫോര്‍ച്യൂണറിന്റെ മേധാവിത്തത്തിന് ഇടിവൊന്നം സംഭവിച്ചിരുന്നില്ല. സെഗ്‌മെന്റില്‍ ഫോര്‍ച്യൂണറിനെ താഴെ ഇറക്കി അധികാരമേറാന്‍ മജസ്റ്ററിന് സാധിക്കുമോ എന്നാണ് ഏവരും ഉറ്റുനോക്കുന്നത്. ഈ സാഹചര്യത്തില്‍ രണ്ട് എസ്‌യുവികളും തമ്മില്‍ ചെറുതായി താരതമ്യം ചെയ്ത് നോക്കിയാലോ?.

ടാറ്റ പഞ്ചിൻ്റെ വരവോടെയാണ് ഇന്ത്യൻ വിപണിയിൽ മൈക്രോ എസ്‍യുവി എന്ന സെഗ്‌മെൻ്റ് ജനപ്രിയമാകുന്നത്. മുമ്പ് മഹീന്ദ്ര KUV100 എന്നൊരു കുഞ്ഞൻ രാജ്യത്തുണ്ടായിരുന്നുവെങ്കിലും കാര്യമായി ക്ലച്ചുപിടിച്ചിരുന്നില്ല. ഇവിടേയ്ക്കാണ് ടാറ്റയുടെ മിടുക്കൻ 2021-ൽ അവതരിക്കുന്നത്. ഹാച്ച്ബാക്കുകൾ ലഭിക്കുന്ന വിലയ്ക്ക് എസ്‌യുവി മുതലാളിയാവാൻ ലഭിച്ച അവസരം ഇന്ത്യക്കാർ നഷ്ടപ്പെടുത്തിയില്ലെന്ന് വേണം പറയാൻ. അഡാറ് സേഫ്റ്റിയും നല്ല ഡിസൈനും മികച്ച ഫീച്ചറുകളുമെല്ലാം കുത്തിനിറച്ചെത്തിയ പഞ്ച് അതിവേഗമാണ് വിറ്റഴിഞ്ഞത്. വിപണിയിലെത്തി അഞ്ച് വർഷങ്ങൾ പൂർത്തിയാക്കുമ്പോഴേക്കും 7 ലക്ഷം യൂണിറ്റ് വിൽപ്പനയും മറികടന്ന് കുതിക്കുകയാണ് ആശാൻ.

ഇന്ത്യക്കാരുടെ പ്രിയപ്പെട്ട പ്രീമിയം ഹാച്ച്ബാക്കാണ് ടാറ്റ ആള്‍ട്രോസ്. 2026 ജനുവരി മാസത്തെ കണക്കുകള്‍ പുറത്തുവരുമ്പോള്‍ വില്‍പ്പനയില്‍ 54 ശതമാനം വളര്‍ച്ച രേഖപ്പെടുത്തിയിരിക്കുകയാണ് ആള്‍ട്രോസ്. 2025 ജനുവരി മാസത്തെ അപേക്ഷിച്ച് മികച്ച മുന്നേറ്റം നടത്താന്‍ ടാറ്റയുടെ ഈ കരുത്തന് സാധിച്ചു.കഴിഞ്ഞ വര്‍ഷം അതായത് 2025 ജനുവരിയില്‍ 2,033 യൂണിറ്റുകള്‍ വിറ്റഴിച്ച സ്ഥാനത്ത് 2026 ജനുവരിയില്‍ ആകെ 3,135 യൂണിറ്റുകളാണ് നിരത്തിലിറങ്ങിയത്. 12 മാസത്തിനുള്ളില്‍ 1,102 യൂണിറ്റുകളുടെ അധിക വില്‍പ്പനയാണ് റിപ്പോര്‍ട്ട് ചെയ്തിരിക്കുന്നത്. പ്രീമിയം ഹാച്ച്ബാക്ക് സെഗ്മെന്റില്‍ ഉപഭോക്താക്കള്‍ക്കിടയില്‍ ടാറ്റ ആള്‍ട്രോസിനുള്ള സ്വീകാര്യത വര്‍ധിക്കുന്നതായാണ് ഈ കണക്കുകള്‍ വ്യക്തമാക്കുന്നത്.

സ്‌കൂട്ടറുകൾ എന്ന് കേൾക്കുമ്പോൾ ഇപ്പോൾ പലരുടേയും മനസിൽ ആദ്യം വരുന്ന പേര് ആക്‌ടിവയെന്നോ ജുപ്പിറ്റർ എന്നോ ആവാം. എന്നാൽ പണ്ടുകാലത്ത് ഗിയർ സ്‌കൂട്ടർ വിപണിയിൽ വിപ്ലവം തീർത്ത ഇതിഹാസമായിരുന്നു വെസ്‌പ. പതിറ്റാണ്ടുകൾക്കപ്പുറം ഗിയർലെസ് പതിപ്പിൽ എത്തിയപ്പോഴും മിന്നുംവിജയം കരസ്ഥമാക്കാൻ വെസ്‌പയ്ക്കായി. പക്ഷേ സാധാരണ സ്‌കൂട്ടറുകളേക്കാൾ അൽപം വില കൂടിയ മോഡലായതിനാൽ വലിയ കണക്കുകളൊന്നും ആശാന് മുമ്പോട്ട് വെക്കാനുണ്ടാവില്ല. പക്ഷേ വെസ്‌പ കൈയിലുണ്ടേൽ അതിൻ്റെ ഫീൽ ഒന്ന് വേറെ തന്നെയാണ്. നല്ല കിടിലൻ പെർഫോമൻസും നല്ല ബിൽഡ് ക്വാളിറ്റിയുമെല്ലാമുള്ള ഇതുപോലൊരു സ്കൂട്ടർ വേറെയുണ്ടോയെന്ന് സംശയമാണ്.