ജർമൻ കരുത്തും സുരക്ഷയും കുറഞ്ഞ വിലയില്‍ സ്വന്തമാക്കാന്‍ ആഗ്രഹിക്കുന്ന ഇന്ത്യന്‍ വാഹനപ്രേമികള്‍ക്ക് ആവേശകരമായ വാര്‍ത്തയുമായി ഫോക്‌സ്‌വാഗണ്‍ രംഗത്ത്. ഇന്ത്യന്‍ വിപണിയില്‍ ഏറ്റവും ജനപ്രീതിയുള്ള കോംപാക്ട് എസ്‌യുവി സെഗ്മെന്റിലേക്ക് തങ്ങളുടെ ഏറ്റവും കുറഞ്ഞ വിലയുള്ള മോഡല്‍ അവതരിപ്പിക്കാന്‍ തയാറെടുക്കുകയാണ് കമ്പനി. 2027 പകുതിയോടെ ഈ പുതിയ എസ്‌യുവി ഇന്ത്യന്‍ നിരത്തുകളില്‍ എത്തുമെന്നാണ് നിലവില്‍ പുറത്തുവരുന്ന റിപ്പോര്‍ട്ടുകള്‍ സൂചിപ്പിക്കുന്നത്. ഓട്ടോ കാര്‍ പ്രസിദ്ധീകരിച്ച റിപ്പോര്‍ട്ട് പ്രകാരം ഫോക്‌സ്‌വാഗണ്‍ ഗ്രൂപ്പിന്റെ ഭാഗമായ ചെക്ക് റിപബ്ലിക്കന്‍ ബ്രാന്‍ഡ് സ്‌കോഡ അടുത്തിടെ പുറത്തിറക്കിയ 'കൈലാക്' (Skoda Kylaq) കോംപാക്ട് എസ്‌യുവിയുടെ അതേ പ്ലാറ്റ്ഫോമിലായിരിക്കും പുതിയ ഫോക്സ്വാഗണ്‍ കാറും നിര്‍മ്മിക്കുന്നത്.

ഗിയർലെസ് സ്‌കൂട്ടറുകളെല്ലാം സ്ത്രീകൾക്ക് മാത്രമുള്ളതാണെന്ന് പറഞ്ഞുനടന്നൊരു കാലം ഇവിടുണ്ടായിരുന്നു. എന്നാൽ വൈവിധ്യമാർന്ന മോഡേൺ സ്‌കൂട്ടറുകളുടെ വരവോടെ ഇന്ത്യക്കാർ ഈ ചിന്താഗതിയെല്ലാം പൊളിച്ചെഴുതുകയും ചെയ്‌തു. കോളേജ് പയ്യൻമാർ വരെ ഇപ്പോൾ സ്‌കൂട്ടറുകൾക്ക് പിന്നാലെ പായുന്ന കാലമാണിത്. എങ്കിലും ഗിയർലെസ്‌ സ്‌കൂട്ടറുകൾ ജനകീയമായത് ലേഡീസിനാണ് ഏറ്റവും കൂടുതൽ അനുഗ്രഹമായത്. ജോലിക്കോ, ഷോപ്പിംഗിനോ ഒക്കെ പോവണമെങ്കിൽ വീട്ടിലുള്ള ആണുങ്ങളെ ആശ്രയിക്കാതെ വാഹനം ഓടിക്കാൻ ഭൂരിഭാഗം സ്ത്രീകളും ഇപ്പോൾ അറിവുള്ളവരായിട്ടുണ്ട്. സ്ത്രീകൾക്ക് അനുയോജ്യമായ സുഖപ്രദമായ സ്‌കൂട്ടറുകൾ (Best Comfortable Scooters For Ladies) ഏതാണുള്ളതെന്ന് തിരയുമ്പോൾ പലർക്കും കൺഫ്യൂഷനുണ്ടായേക്കാം.

കഴിഞ്ഞ വര്‍ഷം ഇന്ത്യന്‍ വാഹന വിപണിയില്‍ തരംഗമായി മാറിയ മാരുതി സുസുക്കി മിഡ്-സൈസ് എസ്‌യുവിയായ വിക്ടോറിസ് (Maruti Suzuki Victoris) പുത്തന്‍ വില്‍പ്പന റെക്കോര്‍ഡുകള്‍ കുറിക്കുന്നു. 2026 ജനുവരിയിലെ വില്‍പ്പന കണക്കുകള്‍ പുറത്തുവരുമ്പോള്‍ വര്‍ഷങ്ങളായി വിപണിയിലുള്ള മുന്‍നിര മോഡലുകളെ പിന്തള്ളി വിക്ടോറിസ് ഇന്ത്യയില്‍ ഏറ്റവും കൂടുതല്‍ വിറ്റഴിക്കപ്പെടുന്ന 10 കാറുകളുടെ പട്ടികയില്‍ ഇടംപിടിച്ചു. കഴിഞ്ഞ വര്‍ഷം സെപ്റ്റംബറില്‍ പുറത്തിറങ്ങിയ ഈ എസ്‌യുവി ചുരുങ്ങിയ കാലയളവിനുള്ളിലാണ് ഈ നേട്ടം കൈവരിച്ചത്. മാത്രമല്ല കോംപാക്ട് എസ്‌യുവി വെറും നാല് മാസങ്ങള്‍ കൊണ്ട് 50000 യൂണിറ്റ് വില്‍പ്പന നാഴികക്കകല്ല് താണ്ടിയതായി മാരുതി സുസുക്കി അറിയിച്ചു.

യൂത്തൻമാരുടെ ഇടയിൽ ഇപ്പോൾ ഏറ്റവും കൂടുതൽ ആരാധകരുള്ള ഇരുചക്ര വാഹന നിർമാതാക്കളാണ് റോയൽ എൻഫീൽഡ് (Royal Enfield). വികാരവും വിറയലും എല്ലാമായി കുടുകുടു ശബ്‌ദത്തിൽ പാഞ്ഞിരുന്ന എൻഫീൽഡുകൾ വയസൻമാരുടെ ബ്രാൻഡായി പലരും മുദ്രകുത്തിയിരുന്നു. എന്നാൽ അവിടുന്ന് ഹിമാലയൻ, കോണ്ടിനെൻ്റൽ ജിടി, ഇൻ്റർസെപ്റ്റർ, ഹണ്ടർ, ഗറില്ല (Guerrilla), സ്ക്രാം തുടങ്ങിയ ഇടിവെട്ട് മോഡലുകളിലൂടെ ചെറുപ്പക്കാരുടെ മനസിൽ കയറിക്കൂടുകയായിരുന്നു എൻഫീൽഡ്. 350 സിസി മുതൽ 650 സിസി വരെയുള്ള മിഡ്-കപ്പാസിറ്റി ഇരുചക്ര വാഹന രംഗത്ത് വിപ്ലവം രചിച്ച് കമ്പനി കുതിക്കുകയാണ്.

ഇന്ത്യയിലെ ഏറ്റവും വലിയ വാഹന നിര്‍മ്മാതാക്കളായ മാരുതി സുസുക്കിയുടെ ആദ്യ ഇലക്ട്രിക് കാറായ ഇ-വിറ്റാരയുടെ (Maruti Suzuki e VITARA ) വില പ്രഖ്യാപനത്തിനായി ഒരു രാജ്യം കാത്തിരിപ്പ് തുടങ്ങിയിട്ട് മാസം കുറേയായി. 2025 ഓട്ടോ എക്‌സ്‌പോയിലൂടെ ആഗോള തലത്തില്‍ അരങ്ങേറ്റം കുറിച്ച ഇലക്ട്രിക് എസ്‌യുവി സ്വന്തം മണ്ണില്‍ നിര്‍മിച്ച് വിദേശത്തേക്ക് കയറ്റുമതി ചെയ്യാന്‍ തുടങ്ങിയെങ്കിലും അത് വാങ്ങുനുള്ള ഭാഗ്യം ഇതുവരെ ഇന്ത്യക്കാര്‍ക്ക് ലഭിച്ചിട്ടില്ല. ഇന്ത്യക്കാരുടെ മാസങ്ങളായ കാത്തിരിപ്പിന് അറുതി കുറിച്ച് ഇ-വിറ്റാര ഏതാനും ദിവസങ്ങള്‍ക്കുള്ളില്‍ പുറത്തിറങ്ങുമെന്ന സന്തോഷവാര്‍ത്തയാണ് ഇപ്പോള്‍ പുറത്ത് വരുന്നത്.

കലണ്ടര്‍ വര്‍ഷത്തിലെ ആദ്യ മാസമായതിനാല്‍ ജനുവരിയിലെ വാഹന വില്‍പ്പന കണക്കുകള്‍ എല്ലാവരും ഉറ്റുനോക്കാറുണ്ട്. 2026 ജനുവരിയിലെ ഇന്ത്യന്‍ വിപണിയിിെല വാഹന വില്‍പ്പന കണക്കുകള്‍ പുറത്തുവരുമ്പോള്‍ വലിയ മാറ്റങ്ങളാണ് പ്രകടമാകുന്നത്. ടോപ് 10 പട്ടികയില്‍ (Top 10 Cars January 2026) 6 മോഡലുകളുമായി മാരുതി സുസുക്കി ആധിപത്യം തുടരുന്നുണ്ടെങ്കിലും വിപണിയിലെ ഒന്നാം സ്ഥാനം കരുത്തനായ ഒരു എതിരാളിക്ക് മുമ്പില്‍ അടിയറവ് വെച്ചു. 2025 ജനുവരി മാസം ഇന്ത്യയില്‍ ഏറ്റവും കൂടുതല്‍ വിറ്റഴിക്കപ്പെട്ട 10 കാറുകള്‍ ഏതൊക്കെയാണെന്ന് ഈ ലേഖനത്തില്‍ വായിക്കാം.

ജാപ്പനീസ് ഇരുചക്ര വാഹന ഭീമന്മാരായ യമഹ (Yamaha) തങ്ങളുടെ ആദ്യ ഇലക്ട്രിക് സ്‌കൂട്ടറായ യമഹ EC 06 (Yamah EC 06) ഇന്ത്യന്‍ വിപണിയില്‍ ഔദ്യോഗികമായി പുറത്തിറക്കി. സിറ്റി റൈഡുകള്‍ക്ക് അനുയോജ്യമായ രീതിയില്‍ രൂപകല്‍പ്പന ചെയ്ത ഈ സ്‌കൂട്ടര്‍ യമഹയുടെ പ്രീമിയം ബ്ലൂ സ്‌ക്വയര്‍ (Blue Square) ഷോറൂമുകള്‍ വഴി മാത്രമായിരിക്കും ഇത് വിപണനം ചെയ്യുക. ഇന്ത്യന്‍ വിപണിയുടെ ആവശ്യങ്ങള്‍ നിറവേറ്റുന്ന ആഗോള നിലവാരത്തിലുള്ള ഇവി സ്‌കൂട്ടറായാണ് യമഹ EC 06 വികസിപ്പിച്ചിരിക്കുന്നത്. ബ്ലൂയിഷ് വൈറ്റ് എന്ന ഒറ്റ നിറത്തില്‍ മാത്രമാണ് നിലവില്‍ ഈ മോഡല്‍ ലഭ്യമാകു.ക

വാഹന രജിസ്‌ട്രേഷന്‍ നമ്പര്‍ ഉയര്‍ന്ന തുകയ്ക്ക് ലേലത്തില്‍ പോകുന്നത് ഇപ്പോള്‍ അത്ര പുതുമയുള്ള കാര്യമല്ല. പെട്ടിയില്‍ പണമുള്ളവര്‍ തങ്ങളുടെ ഇഷ്ട നമ്പര്‍ സ്വന്തമാക്കാന്‍ വേണമെങ്കില്‍ വാങ്ങിയ വാഹനത്തിന്റെ വിലയേക്കാള്‍ കൂടുതല്‍ മുടക്കാന്‍ ഇന്ന് ഒരുക്കമാണ്. ഇപ്പോള്‍ ഇന്ത്യന്‍ വാഹന ചരിത്രത്തിലെ ഏറ്റവും ഉയര്‍ന്ന തുകയ്ക്ക് വില്‍പന നടത്തിയ ഒരു രജിസ്‌ട്രേഷന്‍ നമ്പറാണ് (Vehicle Registration Number) രാജ്യം മൊത്തം ചര്‍ച്ചയാകുന്നത്. 'പൊന്നുംവിലയ്ക്ക്' ലേലത്തില്‍ പോയത് ഒരു വിന്‍േറജ് നമ്പര്‍ പ്ലേറ്റ് (Vintage Number Plate) ആണ് എന്നതാണ് കൗതുകകരമായ സംഗതി.

2026-ലെ കേന്ദ്ര ബജറ്റ് പ്രഖ്യാപനങ്ങളെ തുടര്‍ന്ന് ഇന്ത്യയിലെ ഇലക്ട്രിക് വാഹന (EV) വിപണിയില്‍ നിര്‍ണായക മാറ്റങ്ങള്‍ പ്രതീക്ഷിക്കുകയാണ് ഉപഭോക്താക്കള്‍. രാജ്യത്ത് ഇലക്ട്രിക് വാഹനങ്ങളുടെ വില്‍പ്പനയ്ക്ക് പ്രതീക്ഷിച്ച വേഗത ഇല്ലാതിരിക്കാനുള്ള ഒരു കാരണം അവ വാങ്ങുന്നതിനുള്ള പ്രാരംഭ ചെലവുകള്‍ കൂടുതലാണ് എന്നതാണ്. ഐസി എഞ്ചിന്‍ വാഹനങ്ങളെ അപേക്ഷിച്ച് ഇവികള്‍ക്ക് വില അല്‍പ്പം കൂടുതലാണ്. അതുകൊണ്ട് ഒരു വിഭാഗമാളുകള്‍ ഇപ്പോഴും ഇവി വാങ്ങാന്‍ മടിക്കുന്നു. ധനമന്ത്രി നിര്‍മ്മല സീതാരാമന്‍ ഞായറാഴ്ച (01 ഫെബ്രുവരി 2026) അവതരിപ്പിച്ച കേന്ദ്ര ബജറ്റില്‍ ഇലക്ട്രിക് വാഹനങ്ങളുടെ ബാറ്ററി നിര്‍മ്മാണത്തിന് ആവശ്യമായ അസംസ്‌കൃത വസ്തുക്കളുടെയും യന്ത്രസാമഗ്രികളുടെയും ഇറക്കുമതി തീരുവ കുറച്ചിരുന്നു.

2026 കലണ്ടര്‍ വര്‍ഷത്തിന്റെ ആദ്യ മാസം ഗംഭീര വില്‍പ്പനയുമായി ടാറ്റ മോട്ടോര്‍സ്. 2026 ജനുവരി മാസത്തെ വില്‍പ്പന കണക്കുകള്‍ പുറത്തുവന്നപ്പോള്‍ കമ്പനി പുത്തന്‍ റെക്കോര്‍ഡുകള്‍ സൃഷ്ടിച്ചു. ഇലക്ട്രിക് വാഹനങ്ങള്‍ ഉള്‍പ്പെടെ ആകെ 71,066 യൂണിറ്റുകളാണ് കഴിഞ്ഞ മാസം ടാറ്റ വിറ്റഴിച്ചത്. 2025 ജനുവരിയിലെ 48,316 യൂണിറ്റ് വില്‍പ്പനയെ അപേക്ഷിച്ച് 47.1 ശതമാനം വാര്‍ഷിക വളര്‍ച്ചയാണ് കമ്പനി രേഖപ്പെടുത്തിയത്. ടാറ്റ മോട്ടോര്‍സിന്റെ ചരിത്രത്തിലെ ഏറ്റവും ഉയര്‍ന്ന പ്രതിമാസ വില്‍പ്പനയാണ് ഇത്. ആഭ്യന്തര വിപണിയില്‍ മാത്രം 70,222 യൂണിറ്റുകള്‍ വിറ്റഴിക്കാന്‍ ടാറ്റയ്ക്ക് സാധിച്ചു. 2025 ജനുവരിയില്‍ ഇത് 48076 യൂണിറ്റ് മാത്രമായിരുന്നു.

ഇന്ത്യക്കാർ എസ്‌യുവികളെ ഇഷ്‌ട്ടപ്പെടാനുള്ള പ്രധാന കാരണം ഉയർന്ന സീറ്റിംഗ് പൊസിഷനും ഗ്രൗണ്ട് ക്ലിയറൻസും എല്ലാമാണ്. നമ്മുടെ നാട്ടിലെ പൊട്ടിപൊളിഞ്ഞ റോഡുകൾക്ക് സെഡാനുകളേക്കാളും ഹാച്ച്ബാക്കുകളേക്കാളും ഏറ്റവും നല്ലത് സ്പോർട് യൂട്ടിലിറ്റി വാഹനങ്ങളാണ് എന്നതിൽ ആർക്കും തർക്കമുണ്ടാവില്ല. എസ്‌യുവി എന്ന് കേൾക്കുമ്പോഴേ പലർക്കും ആദ്യം മനസിലേക്ക് ഓടിയെത്തുന്നത് മഹീന്ദ്ര ഥാറിൻ്റെ രൂപമാവും. കൂട്ടിന് അന്യായ റോഡ് പ്രസൻസും കൂടിയാവുമ്പോൾ ഥാറിനെ പ്രണയിക്കാതിരിക്കാൻ വേറെ കാരണമൊന്നുമില്ല. ഇടയ്ക്കൊന്ന് ഓഫ്-റോഡ് പോവണമെങ്കിലും വണ്ടിക്ക് കഴിയും. 226 മില്ലീമീറ്റർ ഗ്രൗണ്ട് ക്ലിയറൻസാണ് മഹീന്ദ്രയുടെ മോഡലിനുള്ളത്.

മൂന്നാം നരേന്ദ്ര മോദി സർക്കാരിൻ്റെ മൂന്നാം ബജറ്റ് ധനമന്ത്രി നിർമല സീതാരാമൻ ഇന്ന് അവതരിപ്പിച്ചു. വാഹന മേഖലയ്ക്ക് ഊർജം പകരുന്ന നിരവധി പ്രഖ്യാപനങ്ങൾ പ്രതീക്ഷിച്ചിരുന്ന 2026-27 വർഷത്തേക്കുള്ള കേന്ദ്ര ബജറ്റ് മൊത്തത്തിൽ നിരാശയാണ് സമ്മാനിക്കുന്നത്. കുന്നോളം ഇളവുകളും മറ്റും പ്രതീക്ഷിച്ചിരുന്ന വാഹന വിപണിയിലും കാര്യമായ ചലനങ്ങൾ സർഷ്‌ടിക്കാനുള്ള പ്രഖ്യാപനങ്ങളൊന്നും ഇത്തവണയുണ്ടായില്ല. ഇന്ത്യ ലോകത്തെ ഏറ്റവും വലിയ മൂന്നാമത്തെ വാഹന വിപണിയായി വളരുന്ന സാഹചര്യത്തില്‍ ഇലക്ട്രിക് വാഹനങ്ങള്‍ക്കും ഹൈബ്രിഡ് സാങ്കേതികവിദ്യയ്ക്കും ബജറ്റില്‍ ലഭിക്കാവുന്ന ഇളവുകളെ കുറിച്ചാണ് വാഹന നിര്‍മ്മാതാക്കളും ഒപ്പം ജനങ്ങളും ഉറ്റുനോക്കിയിരുന്നത്.

ലോകം മുഴുവൻ കീഴടക്കിക്കൊണ്ടിരിക്കുകയാണ് AI സാങ്കേതികവിദ്യ. എല്ലാ മേഖലയിലും ഇപ്പോൾ ആർട്ടിഫിഷ്യൽ ഇൻ്റലിജൻ്റ്സിൻ്റെ സാന്നിധ്യം കാണാനാവും. ഈയൊരു കാര്യം വന്നതോടെ നമ്മുടെ നിരത്തിലെ വാഹനങ്ങൾ വരെ കൂടുതൽ സ്മാർട്ടായി എന്നു പറയാം. പ്രത്യേകിച്ച് ഇവികളിലാണ് ഈയൊരു സംവിധാനം കൂടുതലായി ഉപയോഗിക്കുന്നത്. ഇന്ത്യയിലെ ഇലക്ട്രിക് ഇരുചക്ര വാഹനങ്ങൾ പരമ്പരാഗത പെട്രോൾ വാഹനങ്ങളേക്കാൾ അതിവേഗം സാങ്കേതികമായി മുന്നേറിക്കൊണ്ടിരിക്കുകയാണ്. ഇന്ന് മിക്ക ഇലക്ട്രിക് ബൈക്കുകളും സ്കൂട്ടറുകളും സോഫ്റ്റ്‌വെയർ അധിഷ്ഠിതമായാണ് പണികഴിപ്പിക്കുന്നത്. സേഫ്റ്റി, പെർഫോമൻസ്, ഉപയോഗക്ഷമത എന്നിവ വർധിപ്പിക്കുന്നതിനാണ് AI കൂടുതലായും ഉപയോഗിക്കുന്നത്.

മൂന്നാം നരേന്ദ്ര മോദി സർക്കാരിൻ്റെ മൂന്നാം ബജറ്റ് അവതരിപ്പിച്ച് ധനമന്ത്രി നിർമല സീതാരാമൻ. നിർമ്മലയുടെ തുടർച്ചയായ ഒമ്പതാമത്തെ ബജറ്റ് അവതരണം എന്ന പ്രത്യേകതയ്ക്ക് പുറമെ ഒരു ഞായറാഴ്ച്ച ആദ്യമായി ബജറ്റ് അവതരിപ്പിക്കുന്നുവെന്ന പ്രത്യേകതയും ഇത്തവണയുണ്ട്. വാഹന വിപണിക്ക് പ്രത്യേക ഊന്നൽ കൊടുത്തുകൊണ്ടുള്ള പ്രത്യേക തീരുമാനങ്ങളും ബജറ്റിൽ വന്നിട്ടില്ലെന്നതാണ് രസകരമായ കാര്യം. എങ്കിലും വാഹന മേഖലയ്ക്ക് ഊർജമാവുന്ന സെമികണ്ടക്ടർ മിഷൻ്റെ പ്രഖ്യാപനം ശ്രദ്ധേയമായി. ഇന്ത്യയുടെ സെമികണ്ടക്ടർ പദ്ധതികളുടെ വികസനത്തിനായി 40,000 കോടി രൂപയുടെ പദ്ധതി നിർമല ബജറ്റിൽ ഉൾപ്പെടുത്തിയിട്ടുണ്ട്.

അതിഗംഭീരമായ വാഹനങ്ങൾ വിദേശ രാജ്യങ്ങളിൽ പുറത്തിറക്കി വെന്നിക്കൊടി പാറിച്ചവരാണ് സിട്രൺ. എന്നാൽ ഇന്ത്യയിലെത്തിയപ്പോൾ പദ്ധതികളെല്ലാം പരാജയപ്പെട്ടുപോയെങ്കിലും പോരാടാനുറച്ച് മുമ്പോട്ട് പോവുകയാണ് ബ്രാൻഡ്. മോഡലുകളിലുണ്ടായിരുന്ന കുറ്റങ്ങളും കുറവുകളുമെല്ലാം പരിഹരിച്ച് മിടുക്കൻമാരാക്കിക്കൊണ്ടിരിക്കുകയാണ് സിട്രൺ. എന്നാൽ അതിനിടയിൽ ചെറിയ വില വർധനവ് നടപ്പിലാക്കി ആരാധകരെ നിരാശരാക്കിയിരിക്കുകയാണ ഫ്രഞ്ച് വാഹന നിർമാതാക്കൾ. അതും തങ്ങളുടെ നിരയിലെ എൻട്രി ലെവൽ മോഡലായ C3 പ്രീമിയം ഹാച്ച്ബാക്ക് പോലും ഇനി പഴയ വിലയിൽ ലഭ്യമല്ലെന്നാണ് കമ്പനി അറിയിച്ചിരിക്കുന്നത്. C3 ഹാച്ചിൻ്റെ വേരിയൻ്റ് തിരിച്ചുള്ള പുതിയ വില എങ്ങനെയാണെന്ന് നോക്കിയാലോ?

രാജ്യത്തെ ഫാസ്ടാഗ് (FASTag) സംവിധാനം കൂടുതല്‍ ലളിതമാക്കുന്നതിന്റെ ഭാഗമായി നാഷണല്‍ ഹൈവേ അതോറിറ്റി ഓഫ് ഇന്ത്യ (NHAI) സുപ്രധാനമായ നിയമപരിഷ്‌കാരം നടപ്പാക്കി. ഇന്ന് (2026 ഫെബ്രുവരി 1) മുതല്‍ കാര്‍, ജീപ്പ്, വാന്‍ തുടങ്ങിയ വാഹനങ്ങള്‍ക്കായി ഇഷ്യൂ ചെയ്യുന്ന പുതിയ ഫാസ്ടാഗുകള്‍ക്ക് 'നോ യുവര്‍ വെഹിക്കിള്‍' (KYV) വെരിഫിക്കേഷന്‍ നടപടികള്‍ ആവശ്യമില്ല. ഉപഭോക്താക്കളുടെ പരാതികള്‍ പരിഗണിച്ചാണ് ഈ തീരുമാനം. ഫാസ്ടാഗ് വിതരണത്തിലെ കാലതാമസം ഒഴിവാക്കാനും രേഖകള്‍ സമര്‍പ്പിക്കുന്നതിലെ ബുദ്ധിമുട്ടുകള്‍ കുറയ്ക്കാനുമാണ് ഈ പരിഷ്‌കാരം നടപ്പിലാക്കുന്നത്. മുമ്പ് ഫാസ്ടാഗ് ലഭിച്ച ശേഷം വാഹനത്തിന്റെ ആധികാരികത ഉറപ്പാക്കാന്‍ KYV നടപടികള്‍ നിര്‍ബന്ധമായിരുന്നു.

പുതുവർഷപ്പിറവിയോടെ കാറുകൾക്കെല്ലാം വില വർധിപ്പിക്കുന്ന തിരക്കിലാണ് വാഹന നിർമാതാക്കളെല്ലാം. ചെക്ക് റിപ്പബ്ലിക്കൻ വാഹന നിർമാതാക്കളായ സ്കോഡയും മോഡൽ നിരയിൽ വില പരിഷ്ക്കാരങ്ങൾ നടപ്പിലാക്കി കഴിഞ്ഞിരിക്കുകയാണ്. പുതിയ കുഷാഖിൻ്റെ വരവിനോടൊപ്പം ഇനി പഴയ മോഡലുകൾ വാങ്ങണമെങ്കിൽ പുതുക്കിയ വില നൽകണമെന്ന വാശിയിലാണ് ബ്രാൻഡ്. രാജ്യത്തെ ഏറ്റവും സേഫ്റ്റിയുള്ള സെഡാനുകളിൽ ഒന്നായ സ്ലാവിയയുടെ പരിഷ്ക്കരിച്ച് വില എങ്ങനെയാണെന്ന് ഈ ലേഖനത്തിലൂടെ വിശദീകരിക്കാം. വാങ്ങാൻ പദ്ധതിയുണ്ടെങ്കിൽ പുതിയ വില അറിയാതെ ഷോറൂമിലേക്ക് ഓടാൻ നിൽക്കേണ്ട. ബേസ് വേരിയൻ്റിൻ്റെ വിലയിൽ കൈവെക്കാതെയാണ് സ്കോഡ സ്ലാവിയയുടെ വില പുതുക്കി നിശ്ചയിച്ചിരിക്കുന്നത്.

ഇന്ത്യയിലെ ഏറ്റവും വലിയ കാര്‍ നിര്‍മ്മാതാക്കളായ മാരുതി സുസുക്കി വിപണിയില്‍ കടുത്ത മത്സരം നേരിടുന്നതായി റിപ്പോര്‍ട്ട്. പതിറ്റാണ്ടുകളായി വിപണിയുടെ 40 ശതമാനത്തിലധികം കൈയ്യടക്കി വെച്ച് ഏകാധിപതിയെ പോലെ വാണിരുന്ന കമ്പനിയുടെ ആധിപത്യത്തിന് ടാറ്റ മോട്ടോര്‍സ്, മഹീന്ദ്ര തുടങ്ങിയ സ്വദേശി കമ്പനികള്‍ വലിയ വെല്ലുവിളിയാണ് ഉയര്‍ത്തുന്നത്. 2025-ലെ കണക്കുകള്‍ പ്രകാരം മാരുതിയുടെ വിപണി വിഹിതം 39.91 ശതമാനമായി കുറഞ്ഞു. 2021-ല്‍ വിപണിയുടെ 44.91 ശതമാനം കൈവശം വച്ചിരുന്ന സ്ഥാനത്ത് നിന്നാണ് 5 ശതമാനത്തിന്റെ ഇടിവ് രേഖപ്പെടുത്തിയത്. വിപണി വിഹിതത്തില്‍ ഇടിവ് രേഖപ്പെടുത്തിയെങ്കിലും മാരുതിയുടെ മൊത്തം വല്‍പ്പനയില്‍ വര്‍ദ്ധനവ് ഉണ്ടായി എന്നതാണ് ശ്രദ്ധേയമായ വസ്തുത.

ഹോണ്ട എന്ന വാഹന നിർമാണ കമ്പനിയോട് ഇന്ത്യക്കാർക്ക് പ്രത്യേക താത്പര്യമാണ്. ജാപ്പനീസ് വൈദഗ്ധ്യമുള്ള എഞ്ചിനുകളും നല്ല നിർമാണ നിലവാരവുമാണ് ഈ സ്നേഹത്തിന് പിന്നിലുള്ള പ്രധാന കാരണം. ഇന്ത്യക്കാർ ഏറ്റവും കൂടുതൽ ഇഷ്ടപ്പെടുന്ന സ്‌കൂട്ടർ ആക്‌ടിവ ഓരോ മാസവും വിറ്റഴിയുന്ന കണക്കുകൾ കണ്ടാൽ തന്നെ മനസിലാക്കാനാവുന്നതേയുള്ളൂ ഹോണ്ടയുടെ വീര്യം. ഒപ്പം ബൈക്ക് വിഭാഗത്തിൽ ചൂടപ്പം പോലെ വിറ്റഴിയുന്നത് ഷൈൻ എന്ന മിടുക്കനാണ് (Honda Shine 125). 125 സിസി വിഭാഗത്തിൽ ഏറെക്കാലമായുള്ള മിടുക്കൻ ഓരോമാസവും ലക്ഷക്കണക്കിന് യൂണിറ്റുകളാണ് വിറ്റഴിയുന്നത്.

ജാപ്പനീസ് ഇരുചക്ര വാഹന നിര്‍മാതാക്കളായ ഹോണ്ട ഇന്ത്യന്‍ വിപണിയിലെത്തിക്കുന്ന ജനപ്രിയ കമ്മ്യൂട്ടര്‍ ബൈക്കാണ് ഹോണ്ട ഷൈന്‍. ഏറ്റവും പുതിയ റിപ്പോര്‍ട്ടുകള്‍ പ്രകാരം 2025 ഡിസംബര്‍ മാസത്തില്‍ വിസ്മയിപ്പിക്കുന്ന വില്‍പ്പന വളര്‍ച്ച രേഖപ്പെടുത്തി ഹോണ്ട ഷൈന്‍ കമ്മ്യൂട്ടര്‍ മോട്ടോര്‍സൈക്കിള്‍ വിഭാഗത്തില്‍ വീണ്ടും തങ്ങളുടെ ആധിപത്യം ഉറപ്പിച്ചിരിക്കുകയാണ്. എതിരാളിയായ ഹീറോ സ്‌പ്ലെന്‍ഡറിനെ ഭീതിപ്പെടുത്തുന്നതാണ് ഷൈനിന്റെ വില്‍പ്പനയിലുണ്ടായ കുതിച്ചുചാട്ടം. പ്രമുഖ ഓട്ടോമൊബൈല്‍ വെബ്‌സൈറ്റായ റഷ്‌ലെയ്‌നില്‍ പങ്കുവെച്ച വില്‍പ്പന റിപ്പോര്‍ട്ട് പ്രകാരം 2025 ഡിസംബറില്‍ മൊത്തം 1,41,602 ഹോണ്ട ഷൈന്‍ ബൈക്കുകളാണ് ഇന്ത്യന്‍ നിരത്തുകളില്‍ എത്തിയത്.

പ്രമുഖ വ്യവസായിയും റിയൽ എസ്‌റ്റേറ്റ് രംഗത്തെ അതികായനുമായ സിജെ റോയ് സ്വയം വെടിവെച്ച് മരണത്തിന് കീഴടങ്ങിയ വാർത്ത ഇന്നലെ ലോകം മുഴുവൻ ഞെട്ടലോടെയാണ് കേട്ടത്. ഇന്നും ഈ ഷോക്ക് മാറാതെ വാർത്ത ചാനലുകളെല്ലാം ഏറ്റെടുത്തിരിക്കുകയാണ്. കേന്ദ്ര ഏജൻസികളുടെ റെയ്ഡിനിടെയാണ് കോൺഫിഡൻ്റ് ഗ്രൂപ്പ് ചെയർമാൻ മരണപ്പെട്ടത്. സ്ഥാപനങ്ങളിൽ കുറച്ചുദിവസങ്ങളായി നടന്നുവരുന്ന റെയ്‌ഡിനോട് അനുബന്ധിച്ചുള്ള സമ്മർദ്ദമാണ് സ്വയം വെടിയുതിർക്കാൻ റോയിയെ പ്രേരിപ്പിച്ചതെന്നാണ് സൂചന. വ്യവസായി എന്നതിലുപരി വലിയൊരു വണ്ടിഭ്രാന്തൻ കൂടിയായിരുന്നു കോൺഫിഡൻ്റ് ഗ്രൂപ്പ് ചെയർമാനും സ്ഥാപകനുമായ ചിരിയൻകണ്ടത്ത് ജോസഫ് റോയ്.

1990-കളിലും 2000-ങ്ങളുടെ തുടക്കത്തിലും ബോളിവുഡിലെ മുന്‍നിര നായകന്‍മാരില്‍ ഒരാളായിരുന്നു ഗോവിന്ദ (Govinda). സമാനതകളില്ലാത്ത കോമിക് ടൈമിംഗ്, എക്‌സ്പ്രസീവ് ഡാന്‍സിംഗ്, മാസ് അപ്പീല്‍ എന്നിവ കൈമുതലായുള്ള താരം കൂലി നമ്പര്‍ 1, രാജ ബാബു, ദുല്‍ഹെ രാജ, ആംഖേന്‍, പാര്‍ട്ണര്‍, ഭഗം ഭാഗ്, ബഡേ മിയാന്‍ ചോട്ടെ മിയാന്‍, ഹീറോ നമ്പര്‍ 1 തുടങ്ങിയ ചിത്രങ്ങളിലൂടെ സൂപ്പര്‍ താര പദവിയിലേക്ക് ഉയര്‍ന്നു. എന്നാല്‍ ഇന്‍ഡസ്ട്രി ട്രെന്‍ഡുകളുമായി പൊരുത്തപ്പെടാന്‍ പാടുപെട്ട ഗോവിന്ദ പതിയെ ഫീല്‍ഡ്ഔട്ടാകുന്ന കാഴ്ചയാണ് നാം കണ്ടത്. ബോളിവുഡില്‍ പഴയ മാര്‍ക്കറ്റ് ഇല്ലെങ്കിലും ഗോസിപ്പ് കോളങ്ങളില്‍ ഗോവിന്ദ സ്ഥിരം സാന്നിധ്യമാകാറുണ്ട്.

സിട്രൺ എന്ന ഫ്രഞ്ച് വാഹന നിർമാണ കമ്പനിക്ക് ഇന്ത്യയിൽ നല്ല പേര് കൊണ്ടുവന്ന മോഡലാണ് ബസാൾട്ട് എന്ന കൂപ്പെ എസ്‌യുവി (Citroen Basalt Coupe SUV). ടാറ്റ കർവിനൊപ്പം പുറത്തിറങ്ങിയ മോഡലിനെ ഇതുവരെ ആരും കാര്യമായി കുറ്റം പറഞ്ഞ് കേട്ടിട്ടുണ്ടാവില്ല. . ലംബോർഗിനി ഉറൂസിന്റെ സ്റ്റൈൽ പകർത്തിയെത്തിയ മിടുക്കൻ അതുവരെ ഇന്ത്യ കണ്ടതിൽ വെച്ച് ഏറ്റവും മികച്ച സിട്രൺ കാറായിരുന്നു. ബ്രാൻഡിന്റെ നിരയിലെ ഏറ്റവും നല്ല മോഡൽ ഏതാണെന്ന് ചോദിച്ചാൽ പലരും ആദ്യം പറയുന്ന പേര് ബസാൾട്ട് എന്നാവും.

മുംബൈയിലെ ടാറ്റ മെമ്മോറിയല്‍ ആശുപത്രിയില്‍ അര്‍ബുദത്തോട് പോരാടുന്ന 11 വയസുകാരന്റെ സ്വപ്നം സഫലമാക്കി ഇറ്റാലിയന്‍ സൂപ്പര്‍കാര്‍ നിര്‍മ്മാതാക്കളായ ലംബോര്‍ഗിനി. തനിക്ക് ഏറെ പ്രിയപ്പെട്ട ലംബോര്‍ഗിനിയുടെ വാഹനത്തില്‍ ഒരിക്കല്‍ എങ്കിലും കയറണമെന്ന മുകുന്ദ് എന്ന ബാലന്റെ ആഗ്രഹമാണ് ലംബോര്‍ഗിനി അധികൃതര്‍ നേരിട്ടെത്തി നിറവേറ്റിയത്. ഈ കാരുണ്യപ്രവര്‍ത്തി ലംബോര്‍ഗിനി മുംബൈ ഡീലര്‍ഷിപ്പിന് സോഷ്യല്‍ മീഡിയയില്‍ ഏറെ കൈയ്യടി നേടിക്കൊടുത്തു. മഹാരാഷ്ട്രയിലെ ജല്‍ഗാവ് സ്വദേശിയായ മുകുന്ദ് മുംബൈയിലെ ടാറ്റ മെമ്മോറിയല്‍ ആശുപത്രിയില്‍ ചികിത്സയില്‍ കഴിയവേ ആണ് തന്റെ ജീവിതത്തിലെ ഏറ്റവും വലിയ രണ്ട് ആഗ്രഹങ്ങള്‍ തുറന്നു പറഞ്ഞതെന്ന് ഫ്രീ പ്രസ് ജേണല്‍ പ്രസിദ്ധീകരിച്ച റിപ്പോര്‍ട്ടില്‍ പറയുന്നു.

ടാറ്റ പഞ്ച് തിരികൊളുത്തിയ മൈക്രോ എസ്‌യുവി വിഭാഗത്തെ കൈയിലെടുക്കാൻ ദക്ഷിണ കൊറിയൻ വാഹന നിർമാതാക്കളായ ഹ്യുണ്ടായി പണികഴിപ്പിച്ച് പുറത്തിറക്കിയ മിടുക്കനാണ് എക്സ്റ്റർ (Hyundai Exter SUV). ഇപ്പോൾ നിരത്തിലിറങ്ങിയാൽ ഏറ്റവും കൂടുതൽ കാണാൻ സാധിക്കുന്ന കാറുകളിൽ ഒന്നായി ഇത് വളർന്നുകഴിഞ്ഞു. മികച്ച ഡിസൈനും അൾട്രാ മോഡേൺ ഫീച്ചേഴ്‌സുമായി എത്തിയ കമ്പനിയുടെ എൻട്രി ലെവൽ എസ്‌യുവിക്ക് നല്ല തുടക്കമാണ് ഇവിടെ ലഭിച്ചത്. എന്നാൽ പിന്നീട് വിൽപ്പന പതിയെ താഴാനും തുടങ്ങിയിരുന്നു. അങ്ങനെ പഞ്ചിന് ഭീഷണിയാവാൻ എക്സ്റ്ററിന് സാധിക്കാതെ പോയി.